Arbeidsterapie

Wat is arbeidsterapie?

Arbeidsterapie is die behandeling van die kind in totaliteit, d.m.v. toepaslike, gegradeerde aktiwiteite, om optimale funksionering in die volgende areas te verkry:

1. Grof motoriek bv. balans, motoriese beplanning, postuur en bilaterale integrasie.
2. Fyn motoriek en koördinasie bv. hantering van skêr, potlood, eetgerei, ens.
3. Visuele persepsie.
4. Onafhanklikheid t.o.v. selfversorging, lewensvaardighede en vryetydsbesteding / spel.

Watter dienste bied Arbeidsterapie by die Paarl-Skool?

1. Volledige arbeidsterapie evaluasies.
2. Hulpmiddels en maak van aanpassings vir die klassituasie / huis ten einde die kind in staat te stel om so onafhanklik moontlik te funksioneer in sy daaglikse lewe.
3. Die maak van handspalke.
4. Twee bane van behandeling word gevolg, nl.
   • Pediatrie – Kleuters tot en met kinders in Gr. 4
   • Werksoriëntering – Praktiese fase tot 18 jarige ouderdom.

Watter tipe leerder word gesien in arbeidsterapie?

1. Fisies gestremde leerder bv. spina bifida, spierdistrofie, hoofbeserings, ens.
2. Serebraal gestremde leerder bv. hemiplegie, diplegie, ataksia, ens.
3. Die leergestremde kind wat oor ‘n gemiddelde tot bo-gemiddelde intellektuele vermoë beskik.

Risikofaktore wat aanduidend kan wees vir toekomstige terapie insette

1. Premature geboorte.
2. Traumatiese swangerskap / geboorte.
3. Allergieë.
4. Geskiedenis van leergestremdheid in die familie.
5. Agterstande t.o.v. mylpaalontwikkelling.
6. Genetiese predisposisie.
7. Fisiese gestremdhede.

Watter tekens kan aanduidend wees dat ‘n leerder arbeidsterapie benodig?

1. Tekens tot en met 5 jaar:
   • “Floppy” / Hipotoniese baba.
   • Lomp / ongekoördineerde kleuter.
   • Swak postuur tydens sit, staan en loop.
   • Sukkel met die aanleer van takies bv. aantrek, teken ens.
   • Ontwikkelingsagterstande.
   • Vermydingsgedrag bv. grof motoriese aktiwiteite, fyn motoriese aktiwiteite.
   • Probleme t.o.v. selfversorgingstake bv. aantrek, eet, bad ens.
   • Bang om te waag op speelpark apparaat.
   • Sensitief vir sekere teksture, reuke, smake en geluide.
2. Tekens: ouer as 5 jaar:
   • Probleme met fyn motoriese take bv. inkleur, knip, skryf, knope vasmaak ens.
   • Swak postuur in sit, loop of staan.
   • Swak konsentrasie en / of geheue.
   • Hiperaktiewe gedrag.
   • Presteer ondergemiddeld op skool.
   • Swak volging van instruksies.
   • Swak taakvoltooiing.
   • Afhanklik t.o.v. selfsorgaktiwiteite bv. skoenveters vasmaak, aantrek, eet ens.
   • Vermy sekere aktiwiteite bv. beweging, vuil hande (verf, gom) ens.
   • Soekende gedrag bv. vroetel, sukkel om stil te sit, raak aan persone / objekte.
   • Swak selfbeeld.
   • Gedragsprobleme.